Өчигдөр  (2026.04.01) Улсын Их Хурлын Аюулгүй байдал, гадаад бодлогын байнгын хорооны хуралдаан болсон.

Монгол Улсад агаарын хөлгийн түлш нийлүүлэх тухай Монгол Улсын Засгийн газар болон Оросын Холбооны Улсын Засгийн газар хоорондын хэлэлцээр болон түүнд өөрчлөлт оруулах протоколын төслийг зөвшилцөх талаар хэлэлцсэн юм. Засгийн газраас энэ оны гуравдугаар сарын 17-ны өдөр ирүүлсэн төслийн талаар Монгол Улсын Ерөнхий сайд Н.Учрал хуралдаанд танилцууллаа. 

Ерөнхий сайд Н.Учрал, Байнгын хорооны дарга, эрхэм гишүүд ээ, улс орны эдийн засаг, уул уурхайн үйлдвэрлэлийн өсөлттэй холбоотойгоор манай улсын газрын тосны бүтээгдэхүүний хэрэглээ жил бүр нэмэгдэж, 2025 онд импортын хэмжээ 2.9 сая тонн болжээ. Энэ нь өмнөх оноос 0.1 сая тонноор өссөн байна. Цаашид 2026 онд 3 сая тонн, 2027 онд 3.1 сая тоннд хүрэх төлөвтэй байна.

Өнөөдрийн байдлаар манай улс шатахууны хэрэглээгээ 100 хувь импортоор хангаж байна. 

Үүнтэй холбоотойгоор дотоодын зах зээл дээрх энгийн А92 автобинзенээс бусад төрлийн шатахууны борлуулалтын үнэ энгийн дизель түлш 2200 төгрөгөөр нэмэгдэж 5500 төгрөг, евро-5 дизель түлш 1300 төгрөгөөр нэмэгдэж 5300 төгрөг болж нэмэгдэх нөхцөл байдал үүсээд байна.
 
Цаашид Ойрх Дорнодын мөргөлдөөн энэ хэвээр үргэлжилж, улам хурцдаж газрын тосны үнэ 130 ам.долларт хүрсэн нөхцөлд манай улсад нийлүүлэх дизель түлшний үнэ тонн тутамд 1750 ам доллар, жижиглэнгийн үнэ литр тутамд 3296 төгрөгөөр нэмэгдэх эрсдэлтэй байна.

Олон улсын нөхцөл байдалтай холбоотойгоор газрын тосны бүтээгдэхүүний гаалийн албан татварын хувь, хэмжээг тогтоох эрхийг засгийн газарт олгосноор зах зээлийн нөхцөл байдалтай уялдуулж шатахууны үнийн хэлбэлзлийг түргэн шуурхай зохицуулах боломж бүрдэх өндөр ач холбогдолтой гэв.